هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

نموذج صوت وكتابه : للدراما الأذاعية

اذهب الى الأسفل

نموذج  صوت وكتابه : للدراما الأذاعية  Empty نموذج صوت وكتابه : للدراما الأذاعية

مُساهمة  ذهب البصراوي السبت أغسطس 09, 2014 2:37 pm


تم تمثيل المشهد على الهواء مباشره 
ــــــــــــــــــــــــــــــــــــــــــــــــــــــــــــــــــ
من تأليفي 
الادوار 
دور البائع والعجوز : هيثم عدنان 
دور الأب : ضياء الربيعي 
دور العامل رحومي :: انا قمت بتمثيله
ـــــــــــــــــــــــــــــــــــــــــــــــــــــــــــــــــ
السيناريوا 
 المسمع الاول
( مؤثر صوتي  صوت دجاج )
صوت بائع دجاج يصيح : دجاج  اليكلو بخمسه الكيلو بخمسه
 
امرأه عجوز ( صوت هيثم ) : الله يساعدك يمه
البائع : هلا حجيه
المراه : يمه ما تخلي هذه الديج يمك اروح اسوك واجي  خاف يموت من الحر
 
البائع : صارحجه تدللين جيبي
 
( صوت دجاج )
 
البائع دجاج الكيلو بخمسه يا بلاش يا بلاش
 
الأب : السلام عليكم
البائع عليكم السلام اغا تي أمر كم كيلوا
الأب : تسلم عيني  ما اريد اشتري 
اريد اخلي ابني يمك  بس اسوك واجي
 
البائع يكلم نفسه : او اليوم  كله امانت محد ناوي يشتري
 
الاب : اها  ... شتكول ....
البائع : خلي عيني خلي
الاب : خلي عينك عليه رحم الله والديك
البائع : تدلل يابه
 
ــــــــــــــــــــــــــــ فــــــــاصل مسيقي ـــــــــــــــ
 
 رحومي : السلام عليكم
البائع : عليكم السلام  وين جنت حضرتك هسه يله جاي
رحومي :جنت بالفراش
البائع : وشسوي بالفراش
رحومي :  يعني واحد بالفراش شسوي ياخذ دوش اكيد نايم
البائع : هههه ينكت بعد .. تعال اوكف مكاني بين ما اروح اتريك
باوع . هذه الديج دير بالك عليه  زين
وهذا الطفل لي واكف هناك   خلي عينك عليه خاف يروح منا منا على ما يجون اهله
 رحومي : صار عمي صار
 
رحومي يكلم نفسه : ادير بالي عل ديج شسويله يعني اجيبله جااي
يجوز يريد اذبحه .  خلي اذبحه  كبل لا يجي ويحجي عليه
 
(( مؤثر صوتي .  دجاج يصرخ ))
 
تعال . تعال اكلك لا تقاوم . 
 
ــــــــــــــــــــــــ فاصل مسيقي ــــــــــــــــــــــــــ
البائع : ها رحومي  بعد شي ما بعت
رحومي : ما بعت عمي
البائع : وين الديج
رحومي : ذبحته
البائع : الله يحركك ولك منو كلك ذبحه  مو هذه امانه يمنه هسه شكل للناس  . 
رحومي : مو انته كلت دير بالك عليه 
البائع : وهذه الولد الزغير وين ان شاء الله بعته ويه الدجاج
رحومي : لا بعده حليمي محد يشتري
البائع : ولك لحيمي شنو
روحمي : اشاقه عمي  . اليوم انته كلش عصبي  راح يشرب عصير
البائع : من مصايبك غير كل مصيبه اكبر من الثانيه . اني اروح للبيت من يجون الناس تصرف وياهم انطيهم فلوس انطيهم مكانه دجاج . ان شاء الله ياخذونك انته مكان الديج هم ميخالف
 
ــــــــــــــــــــــــــــــــ فاصل ـــــــــــــــــــــ
الاب : السلام عليكم
رحومي : عليكم السلام .
الاب : وين الامانه ماكو
رحومي : يكلم نفسه ,,,, هذه صاحب الديج  شراح اكله هسه
خليته يلعب ويه الدجاج
 
الاب :  يضحك  ...  اي ملعون يحب يلعب ويه الدجاج
رحومي : هو انه اريد اسالك سؤال يعني
الاب : اسال
 
رحومي : هوه شكد صارله عندك
الاب: شكد صارله عندي شنو .. تقصد عمره
رحومي : ا ي عمره
الاب : 6 سنوات
رحومي : ست سنوات شو ما بي لحمه . انتو ما توكلونه
الاب : اي ما ياكل مالتهي بالجبس والببسي
رحومي : تنطي ببسي  . مدللله كلش
الاب : اي مدللله لعد شعندي غيره هوه الوحيد عندي
 
رحومي : شوف عمي  انته تعرف  الخطأ دائما يصير
احنه  خلينه ويه الدجاج والدجاج هواي . وصار اشتباه وذبحناه
 
الاب : يفائجه ونصدم ... شلون ذبحت ابني .. ذبحت ابني
اليوم اله اذبحك مثل ما ذبحته  . منو يخلصك مني
رحومي : اهدء عمي انه اعرف هوه عزيز عليك وصارله ست سنوات بس ولا يهمك  انطيك مكانه  دجاجتين
 
الاب : ولك دجاجتين شنو  تذبحه  وتنطيني دجاجتين
انته ارهابي انه من شفتك كلت من شكلك مبين عليك ارهابي
تعال دليني  كلي وين خليته بالكي الكه بي روح
 
رحومي  : ما راح  تعرفه . الان هلست الريش مالته
الاب : هلست ريشه شلون تهلس ريشه ما تخاف من الله
يكلم نفسه : بس انه ابني ما عنده ريش
الاب:  يا ريش انته تحجي عن منو
رحومي : عن الديج مالتك
الاب : يا ديج  , ابني الولد لزغير  لي جان واكف هنا
رحومي : هاا  راح يشرب عصير يم ذاك الرجال
الاب : وكفت كلبي الله يوكف كلبك مثل ما موكف عقلك
ـــــــــــــــــــ  فاصل ــــــــــــــــــــــــــــــــــــــ
 
 
المرأه العجوز ( صوت هيثم ) الله يساعدك يمه
رحومي : هلا حجيه
العجوز : خليت يمكم ديج مساع
رحومي : يكلم نفسه (  هاي شراح اكلها هسه )
حجيه احنه خلينه ويه الدجاج وبالغلط ذبحنا
 
بس لا تخافين احنه نطيلج فلوسه
 
الحجيه تكلم نفسها : ما دام هيج خلي اخذ منه  فلوس هواي
 
الحجيه : يا يمه  شلون راح افاركه  اه اه  اه
يوميه كعدني من الصبح .  اكعد على صوته
رحومي : زين انطيج دجاجتين وعليها ساعه منبه
 
الحجيه : لا خاله ساعه منبه شنو
اريده بروقتين
 
رحومي : حته انتي تحجين بالورق .  وبعدين شدعوه بورقتين هوه ديج حته ما يبيض  لو يبيض  بيش بعتي
 
الحجيه : يا يمه انته ما تدري  جان يسوي . يصحيني ينضف البيت يغسلي المواعين
 
رحومي : هذه الديج ..
الحجيه  : ا ه اه اي يمه الديج
رحومي : يغسل مواعين
الحجيه : اي يمه
 
رحومي :  حجيه تردين الصدك  انه جذبت عليج  الديج لا ذبحناه ولا شي .
 
الحجيه : جا وين الديج
 
رحومي : خليناه ويه الدجاج  وضاج . كال راح افتر شويه بالسوك وارجع للبيت .. من ترحين تلكينه كبالج
 
الحجيه : انته تصب عليه ؟؟ وين اكو ديج يحجي  ويفتر بالسوك
 
رحومي : وهو اكو ديج  يغسل مواعين
 

ذهب البصراوي
ذهب البصراوي
عضو

عدد المساهمات : 14
تاريخ التسجيل : 29/07/2014
العمر : 37
الموقع : العراق

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى