هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

عدة مشاهد من أعمالى الفنية

3 مشترك

اذهب الى الأسفل

عدة مشاهد من أعمالى الفنية Empty عدة مشاهد من أعمالى الفنية

مُساهمة  محمد الاسكندرانى السبت سبتمبر 08, 2012 5:36 pm

مشهد من مسلسل (( حياة عائلية ))


مشهد
ليل /خارجى / الشارع / أمام المقهى
يصل حلمى مسرعا أمام المقهى .. حشود كبيرة تقف أمام المقهى .. المعلم سلامة فى الستينات من عمره يرتدى ملابس ريفية ( جلباب وفوقه عبائة وعلى رأسه الطاقية والعمامة ) وأمين يكادا أن يشتبكان .. ونرى ميزو يقف فى أحد الجوانب والدماء تسيل من رأسه .. يقف حلمى بين أمين والمعلم سلامة ...
( ويتحدث بسرعة )
حلمى : فى إيه يابا .. فى إيه يا معلم سلامة .. صلوا عالنبى كده وإهدو
( فى صوتا واحد )
أمين والمعلم سلامة : عليه الصلاة والسلام
( يجلسان فى هدوء .. حلمى للحشود )
حلمى : ياللا يا جماعة كل واحد يروح لحاله
الحشود تتفرق وكلا يذهب فى طريقه .. حلمى يجلس على كرسى بينهما
( يلتفت حلمى للمعلم سلامة )
حلمى : فى إيه يا ملعم سلامة ..؟؟
( بلهجة ريفية )
المعلم سلامة : يرضيك يا حلمى كل ما أجيب صبى للقهوة أبوك يضربه ويعوره ويخليه يطفش
( بعصبية )
أمين : ما أنت إللى بتجيب صبيان قليلى الأدب
( بسخرية )
المعلم سلامة : بجيب ناس عادية ولا أنت عايزنى أجيبلك ناس متخرجين من الجامعة الأمريكية ولا الالمانية
( يقف بغضب )
أمين : أنت بتتريق عليا يا راجل يا مهزق
( المعلم سلامة يقف هو الآخر بغضب )
المعلم سلامة : أنا راجل مهزق يا راجل يا مخبول
أمين : أنا مخبول
( أمين والمعلم سلامة يمدان يديهما ليشتبكا .. حلمى يقف مسرعا ليفصل بينهما )
( حلمى بصوت عالى )
حلمى : يا جماعة صلوا عالنبى
( أمين وسلامة يعودان لهدوئهما ويجلسان .. فى صوتا واحد )
أمين والمعلم سلامة : عليه الصلاة والسلام



[b]مشهد من الفيلم الكوميدى (( العبقرى ))


مشهد
نهار / داخلى / دار فلاحى
ندخل إلى الدارلنتعرف على مجموعة الشخصيات المتواجدة فى الدار طارق و عفت يجلسان على دكة فى منتصف الغرفة .. بينما على يمين ويسار الدكة هناك مجموعة كبيرة من الكراسى المتراصة .. على اليمين تجلس عائلة الحاج حميدة وعلى اليسار تجلس عائلة الحاج صافى ..
الحاج حميدة : يرضيك يا أستاذ طارق تبقى بنت من عيلتنا ماشية فى الشار
ع وشاب من عيلة الحاج صافى يعاكسها
طارق : مين بالظبط إللى عاكسها
الحاج حميدة : الواد فريد
( محدثا فريد وهوشاب فى العشرينات من عمره يجلس وسط عائلة الحاج صافى )
طارق : الكلام إللى بيقوله الحاج حميدة ده حصل
فريد : لا محصلش
( بغضب )
الحاج حميدة : إزاى محصلش .. والناس إللى شافتك
الحاج صافى : إهدا يا حاج حميدة
( محدثا فريد )
الحاج صافى : ولا يا فريد
فريد : نعم يا حاج
الحاج صافى : الكلام ده حصل ولا محصلش
( فريد مترددا )
الحاج صافى : من غير كدب حصل ولا محصلش
فريد : حصل
الحاج صافى : قولتلها إيه ..؟؟
( بتردد )
فريد : قولتلها
الحاج صافى : قول قولتلها إيه
فريد : قولتلها إيه الجمال والحلاوة دى
( موجها كلامه للحاج صافى )
طارق : بعد ما إتأكدنا إنه حصل .. عايزنى أنا أحكم بينكم
الحاج صافى : وإحنا هنلاقى أحسن منك يا أستاذ طارق يحكم بينا
طارق : طب لو عايزنى أحكم بينكم لازم تنفذوا شرطى الأول
( الحاج حميدة والحاج صافى فى صوتا واحد )
الحاج حميدة و الحاج صافى : موافقين
طارق : مش لما تعرفوه الأول
الحاج حميدة : من غيرمانعرف
طارق : يبقى أول حاجة تعملوها إنكم تجيبوا البنت إللى فريد عاكسها أودامى هنا
( منصور أحد أفراد عائلة الحاج حميدة فى الثلاثينات من عمره )
منصور : إيه إللى أنت بتقوله ده
( صارخا بغضب )
الحاج حميدة : ولا كلمة .. حد يخرج يجيب البنت
( أحد أفراد العائلة يخرج .. ثوانى ويدخل ومعه فتاة ترتدى ملابس محتشمة لا يظهر منها غير يديها )
طارق : إنتوا عايزينى أحكم بالعدل
الحاج صافى : طبعا يا أستاذ طارق
طارق : يبقى لازم أشوف وشها
منصور : أنت إتجننت يا أستاذ طارق ولا إيه ..؟؟
( صارخا فى منصور )
الحاج حميدة : واد يا منصور ياتقعد زى البلغة إللى أنت لابسة دى يا تمشى
( منصور يجلس متخوفا )
الحاج حميدة : أنا أسف يا أستاذ طارق حقك عليا
طارق : خلاص يا حاج مفيش حاجة
( الحاج حميدة للفتاة )
الحاج حميدة : عارى وشك يا بت
( الفتاة ترفع غطاء الوجه .. ينكشف الغطاء عن وجه قبيح وعينين محولاتان وانف كبيرة الحجم وفم كبيرالحجم والأسنان بارزة منه .. عفت ينفزع عند رؤيتها )
عفت : أعوذ بالله من الشيطان الرجيم
( طارق يلكز عفت فى كتفه )
الحاج حميدة : خلاص يا بت غطى وشك وأخرجى إنتى
( تخرج الفتاة )
طارق : طيب بما إننا إتأكدنا إنه عاكسها أنا حكمى أنه يتجوزها .. قولت إيه يا حاج حميدة ..؟؟
الحاج حميدة : موافق
طارق : وأنت حاج صافى
الحاج صافى : وأنا أقدر أتانيلك كلمة
طارق : يبقى نقرا الفاتحة
( الجميع يقرئون الفاتحة .. ونرى أثناء قراءة الفاتحة فريد ويكاد أن يبكى .. ينتهون من قراءة الفاتحة .. يقف طارق ويتبعه عفت )
طارق : طب إحنا نستأذن
الحاج حميدة : ما إنتوا قاعدين مشرفنا
طارق : معلش علشان عندنا مشاغل تانية
الحاج حميدة : بس إن شاء الله هتشرفونا فى الفرح
( وأثناء مصافحة طارق وعفت للجميع إستعداد للذهاب يميل عفت على فريد ويهمس فى أذنه )
عفت : ده أخرت الكدب



مشهدان من فيلم ((ماشية بالعكس ))


مشهد 122
نهار / داخلى/ القسم / مكتب حازم
يدخل حازم ويدخل خلفه وائل ويجلس حازم على مكتبه ويقف أمامه ..
(بغضب هادر )
وائل : أنتوا ماتعرفوش أنا مين بتعاملونى المعاملة دى
حازم : إذا كنت فاكر إن الكلام ده هيددنى تبقى حضرتك موهوم ، هدى نفسك وإقعد علشان تعرف أحنا جايبنك هنا ليه
(يجلس وائل ويبدو عليه التوتر)
حازم : مين إللى قتل فاروق بيه
وائل : مش حضرتكم قولتوا أنه سمير هو إللى قتله


مشهد 123
نهار / داخلى / أمام مكتب حازم
يقف رجل أمام مكتب حازم ويتحدث فى الموبايل..
الرجل : ألو ، أيوة ياست ياسمين كل حاجة ماشية زى ما إتفقنا عليها أنا دلوقتى فى القسم وسلمتلهم الأسطوانة .... أه هو قاعد فى مكتب الظابط جوة وبيحققوا معاه وأنا مستنى أمام المكتب .... يعنى حضرتك هتقفلى الموبايل علشان مشغولة .... طب لو عوزت حضرتك هكلمك إزاى ؟ حضرتك إللى هتكلمينى .... مع السلامة

Cut قطع


عودة إلى مشهد 122
حازم : ومين إللى قتل سمير ؟
وائل : الله أعلم
حازم : أه
(حازم ينادى العسكرى )
حازم : سعيد
( يدخل العسكرى)
حازم : دخلى الراجل إللى عندك برة
العسكرى : حاضر ياباشا
(يدخل الرجل ويغلق العسكرى الباب خلفه .. يخرج حازم من درج مكتبه أسطوانة ويضعها داخل الكمبيوترفيسمع صوت يصدر من الكمبيوتر )
صوت ياسمين : أنت ماقولتليش أنت خلصت من الأربعة إزاى
صوت وائل : فاروق باشا بعد لما طلعنا من السجن قالنا أنه بيتاجر فى المخدرات ومدالناش فرصة أن أحنا نرفض نشتغل معاه وهددنا أنه هيرجعنا السجن تانى لأن طبعامفيش حد هيصدق أن فاروق باشا رجل الأعمال بيتاجر فى المخدرات أما نادر وعصام لماعرفت من سمير أنهم بيتفقوا عليا غيرت الكلام إللى قالوه عشان فاروق يصدق أنهم كانوا بيتكلموا عنه وطبعا فاروق خلص منهم وبعد لما سمير خلص على فاروق خلصت منه
(وائل صامت يبدو عليه وجهه الأحمرار )
محمد الاسكندرانى
محمد الاسكندرانى
عضو

عدد المساهمات : 199
تاريخ التسجيل : 05/03/2010
الموقع : أم الدنيا / عروس البحر الأبيض المتوسط

https://www.facebook.com/profile.php?id=100000623811320

الرجوع الى أعلى الصفحة اذهب الى الأسفل

عدة مشاهد من أعمالى الفنية Empty شكرا عالافادة

مُساهمة  شيراز الأحد أكتوبر 14, 2012 4:03 am

من خلال ما كتبت اخي فتحت عيني على اخطاء كنت ممكن اوقع فيها عند تحويل رواية كتبتها الى سيناريو
cut
بين المشهد والاخر والعودة الى المشهد السابق ثم الانتقال بصراحة لم اكن اعرفها
سأظل اقرأ لكل واحد فيكم ما كتب ولن ابدأ اكتب حتى افهم اكتر
شكرا لك

شيراز
عضو

عدد المساهمات : 2
تاريخ التسجيل : 12/10/2012

الرجوع الى أعلى الصفحة اذهب الى الأسفل

عدة مشاهد من أعمالى الفنية Empty رد: عدة مشاهد من أعمالى الفنية

مُساهمة  نسرينا الجمعة يوليو 11, 2014 6:47 pm

حلووو جدا شكررا استاذ محمد

نسرينا
عضو

عدد المساهمات : 37
تاريخ التسجيل : 03/06/2014

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى