نموذج من ما اسميه سيناريو من صنعي :)

السلام عليكم و رحمة الله تعالي و بركاته يارب تكونوا جميعاً في أتم الصحة و أحسن الأحوال

هذه هي اول مشاركة لي في هذا المنتدي المفيد

انا كنت كاتب حاجه حابب اعرضها عليكم و عايز انتقاداتكم و توجيهاتكم و التصحيحات منكم جميعاً انتم لديكم الخبرة عني

يلا بينا نخش في الموضوع ؟

مشهد 1 - خارجي - معهد الخدمة الأجتماعية بـ بنها - نهار


تأتي اصوات الفرحة و البهجة من طلاب المعهد امام كشوف الناجحين و يبدأون بالغناء في آن واحد

الكل : الناجح يرفع ايده هيييه و نغني في عيدنا و عيده هيه و نقول ناجحين . . دايماً . . دايماً علي طول دايماً علي طووووووول

تقف امام الكافيتيريا شروق مستدعية لـ زياد

شروق : يا زياد . . يازياااااد

اصدقاء زياد بسخرية

الأصدقاء : كلم ياعم كلم ياسيدي حبيبة القلب يعني ناجح و بتحب كمان الله يسهلك ياعمونا

زياد : اعوذ بالله منكم ده انتو شلة حقوده اوعي ياعم انت وهوا اروح لـ اللي احسن منكم

ياسر : وقفة الراجل بـ 100 ست ياجدع

زياد : بس ان جت الست يا اوسسس ؟ ؟ تغورو كلكم طبعاً هههههههه

الكل : ههههههههههههههه

مشهد 2 - خارجي - الكافيتيريا – نهار

زياد : كنتي فين يا آنسه روقه

شروق : كان عندي محاضرة بدري

زياد : انا عندي ليكي حتة خبر يابت

شروق : ايه ؟ قول

زياد : بس بشرط

شروق : هاااا

زياد : اخد بوسه مقابل الخبر

شروق : هههههه ياخفه العب غيرها

زياد : لا والله بتكلم بجد

شروق : طب قول بقي و حياتي عندك

زياد : انا ا ت خ ر ج ت . . نجحت ياااابت

شروق : ياحبيبي مبروووووك و ساكت ده كله


زياد : الله يبارك فيكي يلا بقي انا اتخرجت و خديلي ميعاد من حمايا عشان تتخرجي انتي كمان و نقوم عاملين الفرح علي طول

شروق و هي تحلق في عنان السماء من شدة الفرحة

شروق : يخرب بيت مفاجئاااتك . . بحبك يامجنون

زياد : طيب مافيش بوسه ولا حضن تصبيره كده عالماشي

شروق : اتلم

زياد : هااانت قريب بإذن الله نتجوز و ابقي قوليلي اتلم ساعتها بقي

شروق : يسمع من بوقك ربنا ياحياتي . . بقولك ايه بقي انا هاروح للبت إسراء و شيرين هاقولهم اني مش رايحه معاهم عشان نخرج انا و انت

زياد : ماشي و انا هاستني مع الواد ياسر و عصام و باقي الشله . . سلام



مشهد 3 - خارجي - المعهد – نهار

زياد يتراقص بسخرية مُطرباً

زياد : سكر . . حلوه الدنيا سكر لللالالالللا

عصام : ايوه ياعم من حقك . . موزة و تخرج و الدنيا والعه معاك

مشهد 4 – داخلي – المدرج – نهار

تدخل شروق المدرج و مازالت اثار الفرحة تحتل وجهها بينما شلة شروق منهمكين في النميمة

شروق : مين الغلبانه اللي جايبين في سيرتها ياعصابة

شيماء : البت آية دي شكلها عقد و كلاكيع ياشروق قاعده لوحدها دايما و تمشي باصه في الأرض تحسي انها اوفر كده

هبة : اسكتي ياشيماء . . مش احسن ماتبقي زي جيجي اللي كل يوم ماشيه مع ولد شكل و قعداتها كلها مع ولاد

شروق بدهشة

شروق : الله يخرب بيوتكم انتو ماتسيبوش حد في حاله ابداً

إسراء : انتي صحيح كنتي فين كده اختفيتي فجأة

شروق : مفيش كنت بكلم زياد

شيرين بشغف

شيرين : هااا و نجح ؟ ده انا شايفاهم قدام الكشوف

شروق متصنعة الحزن

شروق : للأسف ياشيرين . . . نجح

الجميع صارخين و شيرين و شيماء في آن واحد

شيرين & شيماء : ياكللللبه وقعتي قلوبنا

تعتلي إسراء البينش و تُطرب و يرد عليها الجميع

الكل : افرحي ياعروسه . . ياعروسه ياعروسه هههههههههه

مشهد 5 – خارجي – المعهد – نهار

زياد : اظبط ياد بدال ما اخلي كعب رجلك مكان وشك و بعدين ماتتلحلح ياخويا و شوفلك موزة و اتجوز . . ولا اوعي تكون مابتعرفش ياد ههههههههه

رامي : استغفر الله ياجدع هوا احنا بتوع جواز ولا وش كذلك ؟ يابني ما انت عارف كلنا بالصلاة عالنبي ماحدش بتاع جواز الا انت مش عارف طالع شيطاني في وسطينا كده

زياد : انا برضو بقول مش عارف واحد زيي اتعرف ازاي علي شوية عاهات زيكم

ياسر : خلص ياد و بطل هري عايزين نشوف هانقضي النهار ده فين

زياد : لا اعفيني . . انا النهار ده خارج نطاق السهرة . . ولا ااقولك ابقي اكلمكم بليل و ااقابلكم يلا في الخلعون انا دلوقتي بقي سلام

مشهد 6 - خارجي - ساحة المعهد – نهار

يتمشي زياد بـ بطئ و يجلب موبايله

زياد : ايه ياشروق ماتنجزي بقي بطلي لكاعه

شروق : خلاص والله بصالح اسراء و شيرين و جايه لك علي طول اسبقني علي الموقف وانا هاحصلك . . يلا سلام

زياد يغير مساره للخروج من المعهد متجهاً الي موقف سيارات السيرفيس

مشهد 7 - خارجي - موقف السيارات – نهار

يصل زياد الي الموقف في يده سيجارة مشتعلة يدخنها بكل شراهة

شروق تأتي من خلف زياد

شروق : يادي الهبابة اللي اسمها سجاير يلا ياسيدي علي فكره بقي انا هاقول لبابا انا مش هاتجوز واحد بيشرب سجاير

زياد : وحياة امك ؟ طب و انا هاقول لبابا مش عاوز اتجوز واحده قصيره و أوزعه

شروق : يارخم . . يلا يا استاذ نركب اما نشوف هاتودي الأميرة اللي هيا انا يعني فين

زياد متمتماً

زياد : هوا في اميره اوزعه . . احم يلا ياحبيبتي يلا

مشهد 8 - داخلي - سيارة ميكروباص – نهار

بعد ان اصطدم زياد بـ سقف السيارة وجلس بجانب معشوقته و هي تضحك حتي تستفزه

شروق : شوفت ياحبيبي عشان تحرم و تعرف ان اللي يجي عليا عمره مايكسب و بتتريق عليا اني قصيره

زياد : عايزه جنازه و تشبعي فيها لطم بالزمه في واحده تشمت في حبيبها . . قومي يابت من جنبي اللي بيننا انتهي

شروق غاضبة

شروق : زياد . . بطل الهبل اللي انت بتقوله ده ياساتر عليك بتحدف دبش و انت بتتكلم

زياد : ياعيني علي حبيبتي ياناس بتتأثر و حساسه قوي

يتحرك الميكروباص متجه الي شبرا الخيمة

شروق : مابحبش اسمع الكلام ده منك حتي لو كان هزار و انت عارف كده كويس . . و اوعي بقي

تلقي شروق بـ رأسها علي كتف حبيبها بملامح طفولية حزينه

زياد ضاحكاً
زياد : الله . . مش انتي زعلانه ماتقربيليش بقي

شروق : هوا انا بعرف ازعل منك ياسارقني انت . . بس بقي عايزه انام شويه و برضو زعلانه منك

زياد : خلاص ياقلبي ماتزعليش كنت برخم عليكي بس والله بحب اشوفك و انتي متجننه كده . . نامي و لما نقرب نوصل هاصحيكي


و بعد ان دخلا محطة شبرا الخيمه بدأ زياد بأفاقة حبيبته

زياد : روقه . . اصحي يلا وصلنا ايه النوم العميق ده كله يابنتي

شروق تتثائب

شروق : ما انت عارف الميد تيرمات مطلعه عيني ومابنامش كله علي يدك

زياد : طب يلا وصلنا اهو
مشهد 9 – خارجي – امام محطة مترو شبرا الخيمة - نهار


نزلوا الركاب من الميكروباص ثم نزلا زياد و شروق

شروق : ها بقي هاتوديني فين

زياد : ممممم . . احنا نطلع علي ابو طارق نضرب الكشري المعتبر بتاعنا و نحلي و نروح قهوة البورصه شويه و بعد كده في مفاجئة

شروق بشغف

شروق : مفاجئة ؟ ؟ ايه المفاجئة قول دلوقتي

زياد : متبقاش مفاجئة لو قولتلك سيبيها لوقتها

شروق متعلقة في يد زياد مثل طفلته الصغيره

شروق : طب يلا بينا


مشهد 10 – داخلي – منزل زياد المتواضع - ليلي

يجلس علاء شقيق زياد علي الكمبيوتر الذي لا يصلح سوي سلة مهملات في غرفة تتألف من سريرين صغارً و مكتب خاص بعلاء عليه كتب دراسية تكاد تكون بحالتها الجديدة و اخر خاص بزياد يحمل مراجع و كتب عن التمية البشرية و لغة الجسد و كل مايخص علم النفس تقريباً و بلاكونة صغيرة حتي يتمكن زياد من شرب سجائره بها و محادثة عشيقته ليلاً

تخرج الأم ( لبني ) من المطبخ موجهة حديثها الي زوجها ( حامد ) الذي يجلس امام التلفاز الحديث لمتابعة نشرة الأخبار

الأم : زياد مجاش ليه لغاية دلوقتي ياحامد انا خلاص هاحط الغدا

الأب : لأ ماهو اتصل بيا و قالي انه مع اصحابه وماتعملوش حسابه عالغدا

الأم تتجه ناحية غرفة الأبناء بينما يخرج من الغرفة صوت ضحك علاء بشكل هيستيري

مشهد 11 – داخلي – غرفة زياد – ليلي

الأم بدهشة

الأم : ولا ياعلاء انت اتجننت ولا ايه بتضحك علي ايه

علاء : هههههههه اتجننت ايه يا أمي . . ده صاحبي بيحكي لي علي موقف ضحكني بس شوية

الأم : طب يلا ياخويا قوم عشان تساعدني نطلع الأكل . . و أرحم عينيك من المخروب ده

علاء : طيب روحي بس دقيقتين و جاي وراكي

أنتهي . .

بصراااحه وايد عجبني كبداية وايد ممتاز واصل إبداعك وتسلم ايدك

كبداية فهو مقبول ولكن هناك أربعة أخطاء وقعت فيهم .. مثل : -


1 – وصفك لمكان المشهد قصير جدا وغير كافى وهذا يعتبر ضعف فى السيناريو .. ووصف المكان (( السيناريو )) هو أهم من الحوار لأنه يصف البيئة التى يعيش فيها شخصيات العمل الفنى

2 – لا يوجد ايماءات إلا نادرا وههذا ايضا يعبر عن عدم تملكك من شخصيات العمل .

3 – هناك خطأ فى المشهد 8 .. والخطأ هو كان من المفترض بعد هذه الجملة
(( زياد : خلاص ياقلبي ماتزعليش كنت برخم عليكي بس والله بحب اشوفك و انتي متجننه كده . . نامي و لما نقرب نوصل هاصحيكي ))
أن تضع مشهد أخر لأى مكان أخر ثم تعود للمشهد داخل السيارة بعد وصولها لمحطة شبرا ..  أو مشهد خارجى لسيارة من الخارج ثم تعود تعود للمشهد داخل السيارة بعد وصولها لمحطة شبرا .. وهو مالم تفعل أيا منهما

4 – استخدامك للفعل الماضى ك ((نزلوا / نزلا ))

ومجملا فهو مقبول .. وبالتوفيق إن شاء الله .. وتقبل تحياتى

السلامـ عليكمـ و رحمة الله تعالى و بركاته

إستفدت جداً من توجيهاتكـ له فشكراً لكـ و له.....و لكن عندي إستفسار بسيط :

هل وصف الشخصيات بحد ذاتها شكلها و ما ترتديه مهمـ أيضاً بأهمية وصف الأماكن؟؟

جزاكـ الله خيراً  

بكل تأكيد فوصف الشخصيات من حيث الشكل و الملابس هام كوصف المكان ..  وكل هذا يندرج تحت اسم السيناريو وهو كما ذكرت سابقا ما يعبر عن بيئة شخصيات العمل الفنى

u[f